إعلامي اماراتي متخصص في الكتابات الساخرة، ومصور فوتوغرافي محترف في الأسفار
إعلامي اماراتي متخصص في الكتابات الساخرة، ومصور فوتوغرافي محترف في الأسفار، أعمل حالياً في مجال الاتصال المؤسسي والعلاقات العامة بإحدى الجهات الحكومية في أبوظبي.
ذهبت إحدى الفاشينيستات إلى الساحر (أبوناريله) في بيته الواقع على قمة الجبل ليحقق لها أمنيتها في الزواج، فماذا دار بينهما؟
أبوناريله: منقااااش..ويييييييييينك؟ من يومين محد مر عليه من الزباين؟؟ شو صاير ف الدنيا؟
منقاش: سامحني الغالي... احتمال بسبب المطر محد قدر يوصلك.. بس دقايق.. ياني رقم غريب.. أكيد حد من البنك يذكرني بالأقساط اللي ما دفعتها..! ألووووو..نعم شو تبين؟؟
أبوناريله: ياخي لا تكلمها بهالطريقة...أسميك دفش !! يمكن تبا استشارتي يالغبي..!! «فقدت هالويه» اللي يشبه البومة المكتئبة!
منقاش: سامحني يا أبوناريله...والله مزاجي متعكر اليوم.. يمكن أحتاج إجازة كم يوم..
أبوناريله: أي إجازة بعد؟! خلصت رصيدك كله.. وما عندي استعداد أعطي أي إجازة في هالفترة..كلّم المتصلة وحاول تعرف شو تبا بالضبط!
منقاش: نعم أختي..أنا منقاش مدير مكتب أبوناريله.. آمريني شو ف خاطرج وكيف أقدر أساعدج..؟
الفاشينيستا: منقاشوووووه..أفاااااااااااااااااا.. ماعرفتني..؟؟ أنا اللي رقصت وياك في حفلة راس السنة.. والله انك تجننننننن!!
منقاش: هااااه؟! أي حفلة الغالية..؟ لالالالا..أنا ما شارك في حفلات..المهم عقب بنتفاهم ع الخاص..قوليلي...أي استشارة تحتاجينها من أبوناريله؟؟
الفاشينيستا: أفااااا يامنقاش..نسيت العيش والملح..!!
أبوناريله: منقاش شو صاير؟ وليش مرتبك؟ عطني أكلمها..ألوووو.. هلا بهالصوووت هلا بالزيييييييين..انتي منووووو..؟ شبيكي لبيكي أبوناريله بين ايديكي!
الفاشينيستا: هلا أبوناريله...بصراحة طلبي وأمنيتي في الحياة أني أبا أعرس..وايد تقدمولي بس كله أرفض...ليش؟ مادري!
أبوناريله: أنا أعرف السبب..لأنج تتريين فتى أحلامج..اللي هو أنا..!!
الفاشينيستا: أعوذ بالله من الشيطان الرجيم! أصوم أصوم وأفطر على بصلة !!
أبوناريله: لالا الغالية.. أنا أبوناريله مالي خص في البصل ! ليش أنا شو ناقصني؟ جمال ودلال وصاحب أموال.
الفاشينيستا: مب قصدي والله..بس أبا أقول أنه فيه واحد في بالي من زماااااااان..مب عارفه كيف أكسب قلبه وأتقرب له.
أبوناريله: ومنو هالإنسان اللي الله عامي عينه عنج ؟! بس أبشرج..أنا نظري ستة على ستة.. ومستحيل أشوف حد غيرج!
الفاشينيستا: افهمني ياأبوناريله.. كل البنات يتمنونك...بس والله العظيم أنا قلبي مشغول بإنسان ما يغيب عن بالي لحظة.. إنسان ملك عقلي و«نقش» أسمه في حياتي كلها.
أبوناريله: يعني خلاص...ماشي فايدة أبداً..!! انزين.. خبريني منو سعيد الحظ هذا؟ يمكن أقدر أساعدج وتتزوجينه؟
الفاشينيستا: بصراحة مستحية أقولك... بس أول حرف من اسمه (ميم)!
أبوناريله (يفكر): ميم..؟ يعني ميسي؟!
الفاشينيستا: هههههه..لالالا هذا متزوج وعنده عيال... اللي أحبه هو....
أبوناريله: يالله بسرعة خبريني...تراج حرقتي أعصابي.
الفاشينيستا: ميم..يعني منقااااااااااااااااااااااااااااااش !!
أبوناريله: خسسسسج الله انتي ومنقاشوه مالج!! صدق الطيور على أشكالها تقع!!
