إعلامي اماراتي متخصص في الكتابات الساخرة، ومصور فوتوغرافي محترف في الأسفار
إعلامي اماراتي متخصص في الكتابات الساخرة، ومصور فوتوغرافي محترف في الأسفار، أعمل حالياً في مجال الاتصال المؤسسي والعلاقات العامة بإحدى الجهات الحكومية في أبوظبي.
أم أحمد: مساء الخير حبيباتي الأمهات.. حبيت أبشركم أنه كملنا عشر سنوات في هالقروب الجميل اللي يهدف لمناقشة ومتابعة أحوال عيالنا في المدارس، والتنسيق في أي جديد يخص التعليم؛ لذلك وبهالمناسبة العزيزة.. أدعوكم لعزيمة بسيطة في ميلسنا العامر الجمعة الياية، إن شاء الله.
أم عواطف: مشكووووورة يا مديرتنا الغالية والله احنا اللي مانقدر نوفيج حقج في كل اللي قدمتيه لقروب الأمهات، الله يعطيج الصحة والعافية ومشكورة على الدعوة الكريمة.. وأكيد شي «بوفيه» والا أنا غلطانة؟.. ههههههه.
أم خميس: وانتي ما تفكرين إلا في بطنج يالدبة.. عووووووذ بالله!
أم عواطف: مب شغلج.. محد قالج ترزين بويهج!
أم أحمد: حبيباتي.. خلونا من الكلام الجانبي الحين.. وحبيت أشاوركم في أفضل طريقة أنه العيال يستعدون للامتحانات.. بس قبل كل هذا أرحب بأم سعيد وأم غريب في القروب.. ويااااهلا وسهلا فيكم.. نورتو القروب..
أم سعيد: والله أنا أسعد بانضمامي لكم.. من زماااااااان كان ودي أكون عضوة فعالة والحين يت الفرصة المناسبة، بس ممكن أعرف منو أم غريب؟ اسمها مب غريب!
أم أحمد: حياج الله أختي أم سعيد.. وبالنسبة لأم غريب.. هي من سكان فريج (الدفاشة).. وعندها ولد وحيد في الصف الثاني..
أم سعيد: أوووووو.. خلاص خلاص عرفتها هذي اللي لبسها (عنقاش) وولدها يعض اليهال في المدرسة! الله يسامحج حد يضيف هالأشكال؟
أم غريب: اعتقد أني في قروب محترم إلا وحدة لازم تحسن ألفاظها! وثانياً منو قالج عندي ولد يعض؟ شكلج مخرفة يالعنز!
أم سعيد: اسمعيني أنتي يا أم المشاكل.. إذا مب مصدقة شوفي الصورة اللي حطيتها الحين وبتعرفين أنه ولدج تمساح مب آدمي!
أم أحمد: خواتي.. أنتو بعدكم إيداد وداشين بكل قوتكم ما شاء الله.. من قوانين القروب الاحترام المتبادل واستخدام الألفاظ الراقية والابتعاد عن الابتذال..
أم غريب: أم أحمد.. أنتي ما تسمعينها شو تقول هالخبلة؟
أم سعيد: لو سمحتي يا أم تمساح تحترمين القروب وإلا صدقيني مابتشوفين خير لو تلاقينا في المدرسة.. والله لأقطع شعرج اللي يشبه ليفة الغسيل!
أم غريب: هههههههههه.. الساعة المباركة.. إنتي تعالي بس المدرسة.. والله لسويج لحم مفروم وأخليج عبرة لمن يعتبر!
أم أحمد: خواتي.. رجاااااااااااااء احترام القروب واللي فيه.. وإلا أقولكم.. بضطر أوقف عضويتكم من أول يوم للأسف الشديد.. وأعتذر عن عزيمة يوم الجمعة وسامحوني..
أم عواطف: أفااااااااااااا... يعني ماشي «بوفيه؟!»
