عيسى الطنيجي يكتب: أم مسمار في "الاتش آر!"
إعلامي اماراتي متخصص في الكتابات الساخرة، ومصور فوتوغرافي محترف في الأسفار، أعمل حالياً في مجال الاتصال المؤسسي والعلاقات العامة بإحدى الجهات الحكومية في أبوظبي
أم مسمار، موظفة قديمة في قسم الموارد البشرية، يتصل بها الموظفون لمعرفة آخر المستجدات حول الترقيات، وذات يوم كان الضغط هائلاً على هاتفها.. فماذا حدث؟
أم مسمار: هلا حبيبتي «شوشو» شخبارج فديتج؟ ماشفناج في حفلة طلاق عفروه.. والله انه الحفلة تجنننننن وكانت في اليخت بعد!
شوشو: والله أنج في عالم وأنا ف عالم ثاني يا أم مسمار..المهم..بشريني..طلعت ترقيتي والا بعدها؟ بصييييييح..
أم مسمار: خليني أشوف اللابتوب..مممممممم.. انتي تحبين الأرقام المميزة صح..؟ اللجنة قررت تكون ترقيتج في 3-3-3003..وااااااو الرقم عجيييييييييييب..!
شوشو: خيييييييييييييييييبه ! خلاص بتقاعد أبرك لي..اهئ اهئ اهئ..
(تتلقى أم مسمار اتصال من الموظف يمّوع)
أم مسمار: مرحبا يمّوع.. شحالك..؟ ممكن تقولي أنته تداوم صدق والا كله راقد في البيت؟ من بدت السنة مداوم يومين لا وماخذنهم عن بعد..هههههه..
يمّوع: لا والله أداوم بس ع الخفيف..اتعرفين الشباب والكوفي شوب والسفرات اللي ماتخلص..ماعليه..شو صار بالنسبة لترقيتي..؟
أم مسمار: ويا هالويه! داوم أول شي وعقب اسأل عن الترقية..بس خلني أشوف وين ناقلينك..أتوقع الفرع اللي صوب الحدود ههههه.. !! أووووو..تعال..اسمك في اللستة وأول واحد بعد!! انت شو سالفتك بالضبط؟ منو داعلك أبا أعرف؟
يمّوع: شغالتنا اليديدة..هههههههههه...الله يبشرج بالخير.. يوم أقولج أنا إنسان طموح ومجتهد ماتصدقيني..يالله باي..بسير أنزل أشرب جاهي مغربي ويا الشباب وأفرحهم بالخبر..
أم مسمار: صدق أنه ذيل ال........ مايعتدل!
(تتلقى أم مسمار أتصالاً جديداً من موظف مظلوم)
أم مسمار: هلا هلا بسلّوم المظلوم...ماشاء الله يقولون رافع تظلم...خيييييير؟ عسى ماشر؟
سلّوم: والله ياأم مسمار أنا مب شراتج أترقى كل سنة..بس ياليت تتكرمون عليه بترقية لأني صبرت واااااااايد وطفح الكيل؟
أم مسمار: مستوي (جدر) ماشاء الله عليك! اسمعني.. اسمك دش اللجنة وحصلوا عندك ساعتين تأخير عن الدوام في سنة 1999، وقررت اللجنة بالإجماع عدم ترقيتك!
سلّوم: 1999 !! انزين أنا كنت مسوي حادث في هالفترة وزين مارحت فيها..حرام يكون هذا السبب!
أم مسمار: والله هذا اللي قررته اللجنة...ومشكلتك أنك ماتعرف تسوق..! هاك اليوم لاف عليه عند الدوار يالخديه!
سلّوم: السموحة..أنا الغلطان اني اتصلتبج..مع السلامة! ( يغلق الخط)
أم مسمار: ألوووووووووو.. هلا بميثونة.شحالج ياقلبي...ماشفناج عالريوق اليوم..؟ يايبه بلاليط ولاغلطة...تاكلين صبوع ريولج بعد مب بس ايدج هههههههههههه..
ميثونة: سامحيني يا أم مسمار.. بس أنا في إجازة حالياً..اذا ممكن أعرف عن شو صار بالنسبة لترقيتي..يعني وايد طولت السالفة ووو...............
أم مسمار: لحظة لحظة فديتج..ريلي متقاعد وشكل البرياني ماضبط وياه..ثواني وراجعتلج!
ميثونة: بلاليط وبرياني..! صارت خدمة (طلبات) مب ترقيات!! هههههههههه..