عيسى الطنيجي يكتب: حلّوم و"الفلانتاين"!

خرجت حلّوم وفطّوم في جولة تسوقية بأحد المراكز التجارية الشهيرة، حيث قررت حلّوم شراء بعض الهدايا لخطيبها «سيفوه» بمناسبة «عيد الفلانتاين»..!

فطّوم: خيبة خيبة، شو هاللستة اللي في إيدج؟ إن شاء الله بتشترين كل هالأغراض في يوم واحد؟ صدقيني بتصفرين حسابج وبتمين ع الحديدة لين آخر الشهر.. ويا هالويه !

حلّوم: كل يهوووون لحبيبي (سيفون) !

فطّوم: ههههههه.. حتى اسم الدلع غلط..! يسمونه سوّاف..سيفوه..المهم..ماتشوفين أنه الريال ما يستاهل كل هالهدايا الغالية.. يعني أنا ربيعتج من الابتدائية وماشفت منج إلا شنطة مقلدة من بانكوك..!!

حلّوم: سيفوه غييييير.. بيكون «سلاحي» في مواجهة ظروف الحياة... والسيف اللي بيحميني من الأشرار..

فطّوم: هههههههه..البنت مب صاحية ياجماعة..انتي من متى تقرين قصص غرام وحب..؟ أحيد كل قراءاتج عن الجن والسحرة..

حلّوم: سحرني يا فطوم.. والله أنه سحرني هالإنسان..شوفي صورته في الانستقرام..مايشبه توم كروز؟!

فطّوم: صدقيني يا عيونج حولاء.. أو ما عندج ذوق! أنا أول ما شفته تحريته «دريولكم اليديد» !! هههههه...

حلّوم: أنا الغلطانة اللي آخذ رايج.. المهم... بندش هالمحل..أبا أشتريله ساعة من زماااااااان كان خاطره فيها.. بسويله مفاجأة العمر..

فطّوم: أي ساعة يابنت الناس؟ شوفي سعرها.. كم صفر؟.. واحد اثنينه ثلاثة أربعة خمسة..ياجماعة دار راسي من الرقم..ييبولي عصير ليمون بالنعناع أبا أصحصح شوي..حرام

عليج..سيفوه يباله تي شيرت (سبونج بوب) والسلام ختام..

حلّوم: شكلج ماعندج ذوق في الهدايا.. المهم ياحلّوم..شو بتشترين غير الساعة..ممممممم؟ أهاااا...نسيت الشوز اللي يحبه...بمر آخذه من المحل الثاني. قيمته حوالي 30000 !

فطّوم: شووووز بثلاثين ألف وسيفوه راتبه عشرين ألف بس !! انتي تخبلتي..؟ أقولج شي..خلينا نطلع من المول ونسير أقرب عيادة نفسية يشخصون حالتج المزرية !...

حلّوم: تبين رأيي.. خليني أكمل جولتي التسوقية وانتي ترييني في المحل..ما بتأخر عليج..

فطّوم: تعرفين.. أنا تعبت نفسياً وبدنياً وضيعت وقتي وياج..يالله خلصي وأنا بيلس أقرأ مسجات الواتس أب..

(يدخل شاب إلى المحل ويقترب من فطّوم)

الشاب: الأماااااااااااكن كلها مشتاقة لك..!

فطّوم: والجواتي بعد!! مع الاعتذار للشاعر الراقي... بس انته هذا مستواك.. تعال شكلك مب غريب..

الشاب: أنا سيفوه الأمّور..الحلو المشهور..!

فطّوم: معقولة سيفووووووه الدريول! أأأقصد.. خطيب حلّوم..

الشاب (مرتبكاً): هااه...؟ شوووو.؟ حححححح... حلّوم...؟ من وين تعرفينها..؟

فطّوم: أعرفها لأنها مينونة وخطيبها خبلة!! الحمدلله والشكر...هههههههههههه..